你講真架？

蘋果日報十二月二十日黃偉文在自己的專欄寫道︰
「全首我最喜歡的那句歌詞「音樂話劇詩詞和舞蹈揉合生命千樣好」（估唔到係呢句呢？）」

你講真架？！？！
（又其實係估到既，你話係咪？）
（都成半年咁滯啦，仲玩？！仲講？！有無人生架你？！）

（以上為致送給大家的聖誕小禮物，喜歡否？）
（相信不會有誰喜歡。）
（多謝各位）
（特別鳴謝黃偉文先生）

無聊的驕傲

前文說到，某新新地女老師不堪批改作業壓力，把大好星期日用作哭哭，並把（直資）教育界罄竹難書的罪狀一一羅列。

今天回到寫字樓，發現極多同事缺席（而當中當然不包括我）。你說我阿Q又好，unposhly optimistic 又好，事實上我又真是有點點驕傲呀。最最最起碼，我沒有講大話，沒有請假病假，沒有不尊重自己的工作，甚至還能在代堂時有效批改作業……

我在想，既然在這裡只是一個改文和吼叫機器，毫無成就感可言，那我就為自己的 integrity 感到滿足吧。Integrity 這個 heavy 的字，可不是容易做到的呀。

小註腳︰喊喊喊，你到最後咪又係無事，咁喊來做乜呢 - 不是呀，沒有哭哭，就不會長智慧，也不會加倍發現身邊那位是如此重要。Each moment counts! Viva self-help!

哭鬧甚麼？你是抵死的 - 講講下廢話變成一封信

朋友約親，唔去。有電話打來，盡量唔聽。星期日早上，對住一疊二疊的作文剪報，哭哭。哭完再哭，繼續哭。係呀，我係無用架喇，對住自己應盡的責任哭哭鬧鬧。你簽約果陣應該要預左架啦。再者，你平時肯留到八點星期日咪唔駛哭哭改文囉。再者，你再叻D咪可以五點走都唔駛星期日改文囉。所以個問題係你唔叻喎，唔怪得人架喎。邊個叫你要起碼五分鐘先改起一篇文嘖，你一分鐘改一篇咪得囉。聽講呀，最叻果D同工呀，一秒改一篇添架。所以話，教育界真係藏污納垢架，咁低效率既人都做得老師喎，仲要哭哭啼啼喎。我D金糠仔俾佢地教著，你話點算。

再再再者，五點九走真係唔能夠算遲架喎。你都係七點半開工之嘛，返十個鐘工就走得，你嘈乜嘖？諗落你七點返到屋企，食飯，俾盡你，半個鐘好食完啦。你地 D MISSIE 阿SIR 好興早訓架嘛，俾你十點半訓喇，都仲有三個鐘可以睇 CCTVB，頂多俾一個鐘你飲TENSE UP 沖涼做護膚程序勒。（係呀，D MISSIE真係好無知架，話咩平時訓得太少搞到殘晒要飲TENSE UP喎，乜佢地唔知佢地已經訓得好夠架喇咩？得閒就去做下運動啦，成鬼日著埋D平底鞋都仲嗌腳痛，你話係咪無用？）

咩話？你朝早俾學生激親要時間 BUFFER？日間太忙所以要搵返時間痾屎？又怨話五點九走已經睇唔到相熟中醫師？仲要有時間進行高質素對話及高質素閱讀？因為 SENSE OF ACHIEVEMENT 太低要時間思考人生方向？仲怨話無時間拍拖？！嘩！奇聞喎！你地呢D教書既，原來諗嘢架？！你地無興趣架嘛，連街都唔去咯，閒來淨係去教協掃 YUPI 橡皮糖之嘛。仲有呀，呢D咪係Y 世代囉，打人工要份糧不特止，仲要咩成就感喎，仲話要咩生活喎。睇中醫都勺轉過人，好心你就咪鬼成日病啦，講果幾個鐘書，的咁DUR喉嚨痛就驚到面青，又話咩唔敢請病架喎。細路女，家下有份工你打下就唔該偷笑啦。仲講話咩拍拖喎，電視都有賣啦，呢份天職黎架。有閒情逸致諗呢D嘢既，就改多D文，再唔係就作多D文俾自己改，再再唔係就諗定有咩是非好講，唱下邊個同工嫌辛苦喊苦喊忽，鞏固下自己的教員室地位。

張文光議員，你覺得我說得對嗎？我很贊成 貴會支持普選 - 大抵是我還有一絲微薄的希望，民選的政府會比較把老師當人看待，禁止某些學校的無止境壓榨。我完全贊成教育是有意義的工作，這也是我投身這行業的原因。然而，當老師的生活只剩下兩種選擇 - 1. 以不足的睡眠及極差的健康換取備足課改足文的理想教學環境；2. 貪圖逸樂堅持睡足八個鐘，忍辱偷生地忍受自己的生活只剩下改文和 HEA 教，天天鞭笞自己與想當年念教育的宏大理想漸行漸遠；你覺得種有心但短命的老師或渴求長命的老師，哪一種會對我們的下一代有益呢？又不如問問，哪一種生活比較有意義？當人人（包括我們的親戚、家人甚麼朋友）都會說句「香港地，香港人，打工係咁架啦」，會不會老師才是那個永遠的例外？一群有活力又喜愛自己的工作又得到充分休息的人，會不會才是這個行業所需要的呢？

GM 曱甴上

煮日式咖喱好不好？

最大的願望是牽著手一起去買菜，笑笑過後，看過壯漢劏大蛇衣嘩鬼叫過後，把豐富的食物帶回家，洗切煮，吃吃吃吃吃，笑笑笑笑笑。笑得倦了，軟弱地取出一盒留待特別日子才吃的尊貴雪糕－

窗外，暮色才將至。

timeless.

今天 / 想購置入門單反機的卑微消費者小感受

陽光很好
難道不許
隨時若有需要便睡
忘掉我幾歲

時光不早　
難道只許
為我不關心的宇宙
跳跳追追

送給所有今天出門上班去時，有想過一秒「如果今天不用上班，那該有多好。」的勞動人民。政府在搞慳電膽搞豪宅樓價前，應先立法通過秋天全民休息。

咁好天氣真係應該去野餐、海灘、在公園坐坐、吃早餐後返家睡回籠覺架嘛痴線！九唔搭八話語 - 很想買 500D/1000D呢，這天氣很適合夥拍它拍來拍去嘛！

（先把話說在前頭，我真是甚麼也拔懂的，各位別來抽秤我並暗地裡說「嘩乜佢都學人影相呀？！」。如果要抽秤，最好也不要讓我知道）
（我知我知，這種天氣係人都影到靚相丫嘛，你構圖叻就天陰陰都影到傑作架啦）
（仲有就係個人腦袋少褶，D相真係會露餡架）
（仲有仲有，影相呢D嘢邊係俾你D妹妹仔「玩」架，俾你求其玩玩下就影到正嘢，咁叻去幫人影婚紗相丫笨？！）
（你係叻既100萬像素都影到正嘢格，你唔得既俾支長炮你都無用架喎）
（500D 又好 1000又好，你唔識影既話同部卡片 DC 無分別架喎）

（我替大家把抽秤我的話語都說盡了，所以你們不用說了！）

（多謝各位！）

何德何能

假如我少受一點教育，早就已經粗口連篇了 - 然而，難道因為教育工作者都受了不少教育，不會粗口連篇謾罵，就可以任人魚肉嗎？

向天職說得。諸位真係無病呀嘛。除了滿天神佛、神職人員、得道高僧和父母，這世界上還有其他天職的嗎。不懂中文的人，請先請教辭典/國文老師，不要用錯了詞語貽笑大方。